மர்ஹும் செனட்டர் மசூர்மௌலானா
நாவண்மை காரணமாக ‘நாவலர்’ என்ற பெயரை தனதாக்கிக் கொண்ட கிழக்கு மாகாணத்தின் மருதமுனை மண் ஈன்றெடுத்த செனட்டர் மசூர்மௌலானா, 2015 டிசம்பர் 04 ஆம் திகதி வெள்ளிக்கிழமை தனது 84ஆவது வயதில் இவ்வுலகைப் பிரிந்தார்.
இன்று (04) சனிக்கிழமை அவர் மறைந்து 6 ஆவது ஆண்டு நினைவு தினமாகும். அத் தினத்தை முன்னிட்டு இக்கட்டுரை பிரசுரமாகிறது.
நல்ல பேச்சாற்றலும் திறமையும் கொண்ட மர்ஹும் செனட்டர் மசூர்மௌலானா, தனது 17ஆவது வயதிலே தமிழரசுக் கட்சியின் தலைவர் தந்தை செல்வநாயகத்தை பின்பற்றி பாடசாலை வாழ்விலிருந்து அரசியல் பயணத்தை ஆரம்பித்து, சொல்லின் செல்வர் என்று அழைக்கப்பட்ட செ. இராசதுரையுடன் இணைந்து மட்டுநகர் சென்று தமிழரசு கட்சியின் வளர்ச்சிக்கும் உயர்ச்சிக்கும் அயராது பாடுபட்டுழைத்தார்.
மருதமுனை மக்களின் மதிப்புக்கும் மரியாதைக்கும் உரிய அரசியல் ஆளுமைமிக்க மனிதர் மர்ஹும் செனட்டர் மசூர்மௌலானா, தமது அரசியல் வாழ்வில் அடைந்ததை விட இழந்தது அதிகம் எனலாம்.
கொழும்பு – காலி முகத்திடலில் நடைபெற்ற சத்தியாக்கிரகப் போராட்டம் வெறியாட்டமாக மூண்டதால் வெறியர்களால் பேரையாற்றில் தூக்கி வீசப்பட்ட அவர், படுகாயங்களுடன் உயிர்தப்பியமை விஷேட நிகழ்வாகும். பொதுநலப் பணிகளில் அதிக ஈடுபாடு கொண்ட இந்த அற்புத மனிதரின் வரலாற்று பயணங்கள் கவலைக்குரியவை.
1960 ஆம் ஆண்டுகளில் ஏற்பட்ட போராட்டத்தினால் நாட்டில் அமைதியின்மை ஏற்பட்டது. இதனால் தமிழரசுக் கட்சித் தலைவர்கள், பாராளுமன்ற உறுப்பினர்கள், கட்சிப்போராளிகள் ஆகியோரைக் கைதுசெய்து அரசு வீட்டுக்காவலில் தடுத்து வைத்தது. இதில் மர்ஹும்; மசூர்மௌலானாவும் தடுத்து வைக்கப்பட்டார்.
அக்காலத்தில் தமிழரசுக் கட்சியின் தலைவர்களையும் கட்சியின் தொண்டர்களையும் நன்கறிந்து வைத்திருந்த மசூர் மௌலானா, கட்சி சம்பந்தமான எந்தப் போராட்டத்திலும் மனங்கோணாது தன்னுடைய பங்களிப்பை வழங்கினார்.
மர்ஹும் செனட்டர் மசூர்மௌலானா மருதமுனைக்கோ அம்பாறை மாவட்டத்துக்கோ அல்லது கிழக்கு மாகாணத்துக்கே மட்டும் உரிதான ஒரு சொத்து அல்ல.
இலங்கை வாழ் மக்களின் அதிக ஆதரவைப் பெற்றுத் திகழ்ந்ததுடன் ‘இந்நாட்டு முஸ்லிம் சமுதாயத்தின் உயரிய ‘முதுஷம்’ எனவும் கட்சித் தலைமைகளால் அழைக்கப்பட்டவர். மர்ஹும் செனட்டர் மசூர்மௌலானா நீண்ட கால அரசியல் வரலாற்றுக்கு உரித்தானவர்.
சோல்பரி அரசியலமைப்பின் பிரகாரம் உருவாக்கப்பட்ட செனட்சபையில் அங்கம் வகித்த இருவருள் ஒருவராக, தனது 35ஆவது வயதில் அதாவது 1967ஆம் ஆண்டு செம்டம்பர் மாதம் 20ஆம் திகதி செனட்டராகப் பதவியேற்றார்.
மர்ஹும் செனட்டர் மசூர்மௌலானா செல்லாத கூட்டங்கள் அன்று எங்கும் இடம்பெற்றிருக்க முடியாது. தமிழினத்தின் தன்மானக் குரலை மீட்டிய போதெல்லாம் அதற்கு குரல் கொடுத்து உணர்ச்சி ஊட்டியவர் மசூர்மௌலானா
.
எந்தக் கூட்டத்தில் பேசினாலும் தனது தாயகமான மருதமுனை பற்றி அவர் எவ்வேளையிலும் பிரஸ்தாபிக்காமல் இருந்ததில்லை.
வடகிழக்கு வாழ் தமிழ் – முஸ்லிம் மக்களின் உறவுக்கு முதற் பாலமாக வரலாற்றில் தடம் பதித்த இவர், கொழும்பு சாஹிராவில் ஓர் ஆங்கில ஆசிரியராகப் பணியாற்றினார்.
பலருடைய வாழ்வின் உயர்ச்சிக்கு இயலுமான பணிகளை செஞ்சுக்கு நிறைவாகச் செய்தவர். தொழில்வாய்ப்புகளைப் பெற்றுக் கொடுத்து பலரது வாழ்வுக்கு வளம் சேர்த்து, ஏழை மக்களுக்கு சிறந்த பங்களிப்பை வழங்கினார்.
கரவாகு வடக்கு கிராமசபையின் தலைவர், கல்முனை மாநகர சபையின் உதவி மேயர், கல்முனை மாநகரசபையின் மாநகர முதல்வர், இலங்கை – இந்திய முதலாவது செயலர் உட்பட பல பதவிகளை இவர் வகித்துள்ளார்.
இவர் செய்த சேவைகளில் மசூர்மௌலானா வீதி, பிரேமதாச காலத்தில் நிறுவப்பட்ட மசூர்மௌலானா வீட்டுத்திட்டம், மசூர்மௌலானா மைதானம் போன்றன குறிப்பிடத்தக்கன.
முன்னாள் அமைச்சர் மர்ஹ}ம் ஏ.எச்.எம். அஸ்வர் அமைச்சராக இருந்த வேளை, தனது நண்பன் மேல் உள்ள அன்பினால் மருதமுனையில் விளையாட்டு மேம்பாட்டுக்கு தமது பன்முக நிதியிலிருந்து பணம் ஒதுக்கி, பார்வையாளர் அரங்கை நிர்மாணித்து கொடுத்து நட்பை வெளிப்படுத்தினார்.
அந்தப் பார்வையாளர் அரங்கு, சுனாமி அனர்த்தம் ஏற்பட்ட வேளையிலும் உடையாமல் நின்று நட்புக்கு உதாரணமாக இருந்ததாக அவர் தனது சகாக்களுடன் சுவாரஷ்யமான விடயங்களைப் பகிர்ந்து கொள்ளும் போது பெருமிதத்துடன் கூறுவார்.
செனட்டர் மசூர்மௌலானா, தனது சாச்சா பாரி மௌலானாவின் மகளான புஷ்ரத்துன் நயீமாவை மணமுடித்து, அவரின் முதற்குழந்தை 13 மாதக் குழந்தையாக இருக்கும் போது மரணமாகிவிட்டது. அதன்பின் யஸ்மின், அக்ரம், சியாம், மபாஹிர், இல்ஹாம், நௌஸாத் ஆகிய ஆறு பிள்ளைகள் உள்ளனர்.
மு.கா.ஸ்தாபகத் தலைவர் மர்{ஹம் எம்.எச்.எம். அஷ்ரப் மருதமுனை மண்ணில் நடந்த ஒரு கூட்டத்தில், ‘செனட்டர் மசூர்மௌலானா அரசியல் ஞானத்தையும், சாணக்கியத்தையும் மிக உயர்வாக மதிக்கும் நான், இனி அவரை பிரதேச சபைக்கோ அல்லது மாகாண சபைக்கோ எடுத்துச் செல்லமாட்டேன். அவரை இப்படியே பிடித்து பாராளுமன்றத்துக்கு கொண்டு போய் அமர்த்துவேன்’ என மௌலானாவின் கரங்களைப் பிடித்து மேலே உயர்த்தி வாக்குறுதியளித்தார்.
வாக்குறுதி தந்த தலைவர் மரணமாகிவிட்டதால், செனட்டர் மசூர்மௌலானா மரணிக்கும் வரை அது அவரின் கனவாகவே இருந்தது.
மருதமுனை மண்ணுக்கு மகுடம் சூட்டிய மர்ஹும் மசூர்மௌலானாவின் ஜனாஸா அவர் விருப்பின் பேரில் அவர் பிறந்த இடமான மருதமுனையில் நல்லடக்கம் செய்யப்பட்டது.
எல்லாம் வல்ல அல்லாஹ் அன்னாரின் பாவங்களை மன்னித்து உயர்ந்த சொர்க்கமான ஜன்னத்துல் பிர்தௌஸை வழங்குவானாக!
இன்று செனட்டர் மசூர்மௌலானாவின்
6ஆவது ஆண்டு நினைவு தினம்
