கல்முனை மாநகரசபைஎல்லைக்குள் தமிழ்ப்பிரதேசங்கள் இல்லையா? தமிழர்கள் இல்லையா? என கேள்வியெழுப்புகிறார் ராஜன்.
கல்முனை மாநகரசபைக்குட்பட்ட சாய்ந்தமருது தொடக்கம் பெரியநீலாவணை வரை கடற்கரை சூழலை அபிவிருத்தி செய்வது தொடர்பான கலந்துரையாடல் கல்முனை மாநகரசபை மேயரின் எற்பாட்டில் நாடாளுமன்ற உறுப்பினர் ஹரீஸ் தலைமையில் இடம்பெற்றுள்ளது.இதில் மாநகரசபை மேயர் மற்றும் அதிகாரிகள் கல்முனை தெற்கு பிரதேச செயலாளர் உட்பட பலர் அழைக்கப்பட்டு நடைபெற்றுள்ளது.
கல்முனை மாநகர கரையோர அபிவிருத்தி திட்டமிடல் குழுவின் இக்கலந்துரையாடல் தொடர்பாக மாநகரசபையின் தமிழ் உறுப்பினர்களுக்கோ கல்முனை வடக்கு பிரதேச செயலாளருக்கோ எந்த அறிவித்தலும் வழங்கப்படாமலும் அழைக்கபடாமலும் நடைபெற்றுள்ளது. குறித்த திட்டம் தொடர்பில் கல்முனை முஸ்லிம் பிரதேச செயலகத்திலும் மாநகரசபையிலும் இருவேறு கூட்டங்கள் நடந்துள்ளன.
இக்கூட்டங்களுக்கு தமிழர்கள் அழைக்கப்படவில்லை. தமிழ்ப்பிரதிநிதிகளுக்கு கதவடைப்பு இடம்பெற்றமை தொடர்பாக உறுப்பினர் ராஜன் மேலும் கூறுகையில்:
கல்முனை மாநகரசபைக்குட்பட்ட கடற்கரை பகுதிகள் எனும்போது சாய்ந்தமருது கல்முனைக்குடி மருதமுனை ஆகிய மூன்று முஸ்லிம் கிராமங்களும் கல்முனை பாண்டிருப்பு பெரியநீலாவணை ஆகிய மூன்று தமிழ் கிராமங்களும் உள்ளன. ஆனால் தமிழ் தரப்புக்கு இது தொடர்பாக எந்த தகவலும் கிடைக்கவில்லை.
கல்முனை மாநகர சபை என்பது தனியாக முஸ்லிம்களுக்கு மட்டுமானது அல்ல. கல்முனை மாநகர மேயரினதும் நாடாளுமன்ற உறுப்பினர் ஹரிசினதும் செயற்பாடு தமிழர்களை புறக்கணிப்பதாகவும் இனவாதமாக செயற்பட்டு வங்குரோத்து அரசியல் செய்வதாகவுமே தொடர்கிறது.
இப்படிப்பட்ட தொடர் புறக்கணிப்பும் பாகுபாடுமே தமிழ்மக்கள் தனியான பிரதேச செயலகம் தனியான நகரசபை கோருவதற்குக்காரணம் என்பதை மறக்கக்கூடாது. இவர்களிருவரினதும் செயற்பாடுகளை வைத்து முழு முஸ்லிம் மக்களையும் குற்றம்சாட்டமுடியாது. இவர்கள்தான் காலாகாலமாக ஒற்றுமையாகவிருந்த தமிழ்முஸ்லிம் சமுகங்கள் பிரிந்துநிற்பதற்குக் காரணம். கல்முனையில் இருசமுகங்களும் இனரிதீயாக பிளவுபடுவதற்கு இவர்கள் இருவரும் தொடர்ச்சியாக பாடுபட்டுவருகின்றனர்.இந்த லட்சணத்தில் இன ஜக்கியம் பற்றியும் பேசிவருகின்றனர்.
கல்முனை நகரஅபிவிருத்திட்டம் கொண்டுவரப்பட்டபோதும் வேண்டுமென்றே தமிழ்பிரதிநிதிகளை அழைக்காமல் அத்தனை கூட்டங்களையும் திரைமறைவில் நடாத்தினார்கள். நாம் பூரணமாக எதிர்த்தோம். அதனால் அத்திட்டம் கிடப்பில் உள்ளது.முஸ்லிம் சகோதரர்கள் இந்த உண்மையை தெரிந்துகொள்ளவேண்டம்.
இப்படி இனரீதியாக தொடர்ச்சியாக செயற்படும் மேயருக்கு இப்போதும் எமது சில தமிழ்உறுப்பினர்கள் அவருக்கு ஆதரவு வழங்குவது நீதியா ?நியாயமா? இதற்குப்பின்னால் கையூட்டல்கள் இருக்கிறதோ என சந்தேகிக்கவேண்டியுள்ளது.
கல்முனை மாநகர சபை என்பது அனைத்து இனங்களுக்கம் பொதுவானது. தங்கள் அதிகாரங்களை வைத்து பக்கச்சார்பாக செயற்படுவதாயின் கல்முனை மாகரசபையை பிரித்து கல்முனை வடக்கு நகர சபை ஒன்றை அரசாங்கம் உருவாக்க வேண்டும் என்றார்.
